JESHI LA MAGEREZA TANZANIA KUBORESHA HUDUMA ZA AFYA KWA WAFUNGWA NA MAHABUSU

Mkuu wa Jeshi la Magereza, CGP Jeremiah Yoram Katungu, amesema Jeshi la Magereza linaendelea kuboresha utoaji wa huduma za Afya kwa Wafungwa, Mahabusu na Jamii nzima, kwa kuboresha miundombinu ya utoaji huduma, ununuzi wa dawa na vifaa tiba na uwepo wa wataalamu wa Jeshi zaidi ya 700 nchi nzima.

Akizungumza wakati wa kufunga Mkutano wa Wataalamu wa Afya wa Jeshi la Magereza, Oktoba 23, 2026 CGP Katungu, amewata kutekeleza wajibu kwa ufanisi na uzalendo ili kuboresha huduma za Afya, akieleza kuwa uboreshaji huo utasaidia kupunguza rufaa kwa magonjwa yanayoweza kutibika katika vituo vyetu, hali itakayopelekea kupunguza madeni ya matibabu.

"Niwatake wataalamu wa Afya mkaboreshe utoaji wa huduma, hiyo itasaidia kupunguza rufaa kwa yale magonjwa ambayo tunaweza kuyatibu katika vituo vyetu na kupunguza madeni ya matibabu ya Wafungwa na Mahabusu" amesema CGP. Katungu

Aidha, amesema ili kukabiliana na changamoto za kugharamia matibabu ya Wafungwa na Mahabusu, Jeshi kwa kushirikiana na Wizara ya Mambo ya Ndani ya Nchi, limeandaa rasimu ya andiko la matumizi ya bima ya Afya kwa Wafungwa na Mahabusu, ikiwa ni kutekeleza agizo la Rais Dkt. Samia Suluhu Hassan, akieleza kuwa rasimu hiyo ipo katika hatua ya mapitio na maboresho.

Pia, CGP. Katungu, ameishukuru Serikali kupitia Wizara ya Afya kwa kuahidi kusaidia ujenzi wa Hospitali ya Kanda ya Kati ya Jeshi la Magereza jijini Dodoma, na kuiwezesha vifaa ili ianze kutoa huduma, huku akiwataka wataalamu wa Afya wa Jeshi kujisajili katika mabaraza ya kitaaluma na kuhuisha leseni zao, huku akielekeza ununuzi wa dawa na vifaa tiba uendane na bajeti iliyopo.

Kwaupande wake, Kamishna wa Fedha na Mipango, CP. Chacha Bina Jackson, amepongeza ongezeko la ukusanyaji wa mapato katika Zahanati za Jeshi, huku akiagiza kuendelea kutumika kwa Mfumo wa GOTHOMIS, wakati tukisubiri kuanza rasmi kwa mfumo ulioundwa na wataalamu wetu wa TEHAMA wa TPS e-Hospital Management.

Naye Mkuu wa Sehemu ya Afya Jeshi la Magereza, SACP. Nsajigwa Mwankenja, amesema mafunzo hayo yamesaidia kuwajengea uwezo wataalamu wetu, huku yakijumuisha wataalamu zaidi ya 200 kutoka vituoni.

CGP. JEREMIAH KATUNGU AWAVISHA VYEO VIPYA MAAFISA 839 WA JESHI LA MAGEREZA

Mkuu wa Jeshi la Magereza nchini CGP Jeremiah Yoram Katungu,leo Julai 11, 2025 amewavisha vyeo vipya maafisa 29 wa Magereza Makao Makuu,  ikiwa ni miongoni mwa maafisa 839 waliopandishwa vyeo kwa kada mbalimbali katika Jeshi la Magereza Tanzania  bara, kwa mwaka 2024/2025.

Akizungumza katika hafla hiyo ya uvalishaji vyeo CGP. Katungu  amemshukuru Rais wa Jamhuri ya Muungano wa Tanzania Mhe.Dkt.Samia Suluhu Hassan, kwa kuliwezesha Jeshi la Magereza kutekeleza majukumu yake na kutoa kibali cha upandishaji vyeo  kwa Maafisa hao. 

Aidha, CGP. Katungu amewapongeza maafisa wote walio panda vyeo nchi nzima na kuwataka kufanya kazi kwa uweledi,uadilifu huku akieleza kuwa ni matarajio ya Jeshi na Serikali kwaujumla kuwa watatekeleza majukumu yao kwa ufanisi mkubwa na kutanguliza mbele maslahi na ustawi wa Jeshi la Magereza na Taifa kwaujumla.

Kwaupande wake Kamishna wa Sheria na Uendeshaji wa Magereza CP. Nicodemus Tenga, amewapongeza Maafisa wote waliopandishwa vyeo na kuwataka wakatafute suluhisho la matatizo yaliyopo katika sehemu zao za kazi ili kuleta ufanisi wakiutendaji katika Jeshi.

Akitoa neno la shukrani kwaniaba ya wote waliopandishwa vyeo, Kamishna Msaidizi wa Magereza (ACP) Elmas Mgimwa, amemshukuru Rais wa Jamhuri ya Muungano wa Tanzania kwa kuridhia kibali cha upandishaji vyeo pamoja na Tume ya Utumishi wa Jeshi la Polisi, Magereza, Zimamoto na Uokoaji na Uhamiaji na uongozi mzima wa Jeshi la Magereza kwa kuwapendekeza.

Maafisa hao wamepandishwa vyeo kuanzia Julai 07, 2025 kwa mujibu wa Muundo wa Maendeleo ya Utumishi wa Jeshi la Magereza wa mwaka 2015 na kuzingatia Ikama ya Jeshi.

WAKUU WA MAGEREZA MIKOA NA MAGEREZA YOTE NCHINI WAPONGEZWA UTEKELEZAJI MATUMIZI YA NISHATI SAFI

Mkuu wa Jeshi la Magereza nchini (CGP) Jeremiah Yoram Katungu amewapongeza wakuu wa Magereza mikoa na Magereza yote nchini kwa utekelezaji wa agizo la Rais wa Jamhuri ya Muungano wa Tanzania Mhe. Dkt. Samia Suluhu Hassan, kuhusu matumizi ya nishati safi ya kupikia.

Pongezi hizo amezitoa Aprili 15, 2025 kwenye kikao kazi kilichofanyika katika Ukumbi wa mikutano wa Makao Makuu ya Jeshi la Magereza Msalato jijini Dodoma.

"Ninayo furaha Magereza yote nchini tumeachana na matunizi ya kuni na sasa tunatumia nishati safi ya kupikia" Alisema CGP Katungu.

Pia, CGP. Katungu amewataka kutorudi nyuma katika matumizi ya kuni, badala yake waendelee kutumia nishati safi ya kupikia kama Serikali ilivyoagiza.

Aidha, CGP. Katungu, amewaeleza Wakuu wa Magereza mikoa na Magereza kuwa Jeshi la Magereza limefanya ushirikiano na taasisi ya Elimu na Mafunzo ya ufundi stadi (VETA) na hivi karibuni imeweza kutunuku vyeti wafungwa 201.

Vilevile, Jeshi la Magereza linaendelea na mazungumzo na Chuo cha Uhasibu Arusha ili kuanza kutoa masomo kwa njia ya mtandao(online) kwa kuanzia na masomo ya ujasiliamali kwa wafungwa magerezani.

Pia, CGP Katungu amewataka watumishi wote wa Jeshi la Magereza kudumisha upendo, mshikamano miongoni mwao kwaajili ya maendeleo ya Taifa.

Kwa upande wake,Kamishna wa Sheria na Uendeshaji wa Magereza, (CP)Nicodemus Tenga 

amewataka wakuu hao wa Magereza mikoa na Magereza yote nchini kukusanya taarifa za wafungwa wenye sifa zitakazowezesha kujadiliwa katika Bodi za Parole kwa kuwa mchakato wa kumjadili mfungwa huanzia katika Kamati za urekebishaji ya Gereza, ili wafungwa wenye sifa ya kunufaika na mpango huo wanatakiwa wapatiwe.

Akitoa neno la shukrani kwa niaba ya Wakuu wa Magereza mikoa na Magereza yote nchini, Mkuu wa Magereza Mkoa wa Mwanza Kamishna Msaidizi Mwandamizi (SACP) Masud Kimolo, alimshukuru Mkuu wa Jeshi la Magereza (CGP) Jeremiah Katungu nakuahidi maelekezo yote ambayo ameyatoa watayatekeleza na kufanya kazi kwa weledi wa hali ya juu kwa manufaa ya Jeshi na Taifa kwa ujumla.