UTEUZI MPYA WA KAMISHNA JENERALI WA JESHI LA MAGEREZA

Read More

KAMISHNA JENERALI WA MAGEREZA AWAVISHA VYEO MAOFISA WAANDAMIZI TISA WA JESHI LA MAGEREZA JIJINI DAR

Jenerali wa Magereza, Dkt. Juma Malewa(kulia) akimvalisha cheo akimvalisha cheo Naibu Kamishna wa Magereza, Tusekile Mwaisabila kuwa Kamishina wa Magereza katika hafla fupi iliyofanyika kwenye viwanja wa Chuo cha Taaluma ya Urekebishaji, Ukonga jijini Dar es salaam Juni  8, 2018.

Kamishna Jenerali wa Magereza, Dkt. Juma Malewa(kulia) akimvalisha cheo Mkuu wa Magereza Mkoani Tanga, Kamishna Msaidizi Mwandamizi wa Magereza, John Masunga kuwa  Naibu wa Magereza katika hafla fupi iliyofanyika kwenye uwanja wa Chuo cha Taaluma ya Urekebishaji, Ukonga jijini Dar es salaam Juni  8, 2018.

Makamishina na Manaibu Kamishna wa Magereza wakisoma Tamko la Ahadi ya Uadilifu kwa Viongozi wa Umma baada ya kuvalishwa vyeo na Kamishna Jenerali wa Magereza, Dkt. Juma Malewa katika hafla fupi  iliyofanyika kwenye viwanja wa Chuo cha Taaluma ya Urekebishaji, Ukonga jijini Dar es salaam leo Juni 2, 2018.

Kamishna Jenerali wa Magereza, Dkt Juma Malewa akikagua gwaride maalum katika hafla ya uvishaji vyeo kwa Maafisa Waandamizi wa Jeshi la Magereza.

Baadhi ya Maafisa Wastaafu na waliopo sasa wa Jeshi la Magereza wakifuatilia hafla fupi ya uvishaji vyeo kama inavyoonekana katika picha. 

Kamishna Jenerali wa Magereza, Dkt. Juma Malewa(wa tatu kulia) akiwa katika picha ya pamoja na Maofisa Waandamizi wa Jeshi la Magereza waliowavalisha vyeo hivyo kwa niaba ya Rais John Pombe Magufuli ambapo hafla hiyo imefanyika katika viwanja vya Chuo cha Taaluma ya Urekebishaji, Ukonga jijini Dar es salaam Juni, 8, 2018

(Picha zote na Jeshi la Magereza)

Na Mwandishi wetu,

KAMISHNA Jenerali wa Magereza nchini, Dkt. Juma Malewa, kwa niaba ya Amiri jeshi mkuu Rais John Magufuli amewavisha vyeo maafisa wa ngazi ya juu 9 wa Jeshi la Magereza waliopandishwa vyeo hivyo hivi karibuni na Rais wa Jamhuri ya Muungano wa Tanzania.

Miongoni mwa maafisa 9 waliovishwa vyeo ni manaibu kamishna wa magereza - DCP wanne wa Jeshi hilo ambao wamepandishwa vyeo na kuwa Makamishna wa magereza, huku makamishna wasaidizi waandamizi wa Magereza -SACP watano wakipandishwa vyeo kuwa Manaibu Kamishna - DCP wa Jeshi hilo.

Waliovishwa vyeo kuwa Makamishna wa Magereza ni Naibu Kamishna wa Magereza Uwesu Ngarama, Boharia Mkuu wa Jeshi la Magereza, Naibu Kamishna wa Magereza Tusekile Mwaisabila, Mkuu wa Divisheni ya Huduma za Urekebishaji, Naibu Kamishna wa Magereza Augustine Mboje, Mkuu wa Magereza Mkoa wa Dar es Salaam pamoja na Naibu Kamishna wa Magereza Gideon Nkana ambaye ni  Mkuu wa Chuo cha Taaluma ya Urekebishaji Ukonga, Dar es Salaam.

Wengine waliovishwa vyeo kuwa Manaibu Kamishna wa Magereza ni  Kamishna Msaidizi Mwandamizi wa Magereza, Julius Sang’udi, Mkuu wa Magereza Mkoa wa Dodoma, Kamishna Msaidizi Mwandamizi wa Magereza, Afwilile Mwakijungu, Mkuu wa Magereza Mkoa wa Iringa, Kamishna Msaidizi Mwandamizi wa Magereza, John Masunga, Mkuu wa Magereza Mkoa wa Tanga, Kamishna Msaidizi Mwandamizi wa Magereza, Phaustine Kasike, Mkuu wa Kitengo cha Parole pamoja na Kamishna Msaidizi Mwandamizi wa Magereza, Jeremiah Katungu ambaye ni Katibu Ofisi ya Kamishna Jenerali wa Magereza.

Akizungumza mara baada ya kuwavisha vyeo Maafisa hao wa magereza(Ijumaa, Juni 8, 2018) katika hafla ya kuwavisha vyeo hivyo iliyofanyika kwenye viwanja vya Chuo cha Taaluma ya Urekebishaji Tanzania (TCTA), Ukonga, jijini Dar es Salaam,  Kamishna Jenerali wa Magereza, Dkt. Juma Malewa amewataka makamishna hao wa Jeshi la magereza wa ngazi zote kuendelea kufanya kazi kwa weledi, uadilifu  sambamba na kusimamia haki na usawa katika utekelezaji wa majukumu yao kila siku.

Aidha, Jenerali Malewa amemshukru Amiri jeshi mkuu Rais John Magufuli kwa kuwapandishwa vyeo maafisa hao ambao watajaza nafasi mbalimbali za juu za uongozi ndani ya Jeshi la Magereza kwani kwa muda mrefu safu ya juu ya uongozi ilikuwa na upungufu mkubwa wa kada ya maafisa wa vyeo hivyo hali iliyopelekea kuathiri utendaji kazi wa Jeshi hilo.

Maafisa hao kabla ya kuvishwa vyeo hivyo walivyotunukiwa  na Rais wa Jamhuri ya Muungano wa Tanzania Dkt. John Pombe Magufuli kuanzia Juni 02, 2018, walipata fursa ya kula kiapo cha Tamko la Ahadi ya Uadilifu kwa Viongozi wa Umma mbele ya katibu wa sekretarieti ya maadili ya viongozi wa umma.

Read More

TAARIFA KWA VYOMBO VYA HABARI

MSAMAHA WA RAIS KWA WAFUNGWA KATIKA KUADHIMISHA MIAKA 54

YA MUUNGANO WA TANZANIA TAREHE 26 APRILI, 2018

Katika kuadhimisha Miaka 54 ya Muungano wa Tanzania tarehe  26 Aprili, 2018 Mheshimiwa Rais wa Jamhuri ya Muungano wa Tanzania kwa kutumia madaraka aliyopewa chini ya Ibara ya 45(1)(d) ya Katiba ya Jamhuri ya Muungano wa Tanzania ametoa msamaha kwa wafungwa wafuatao:-

(i)      Wafungwa wote wapunguziwe robo (¹/₄) ya adhabu zao baada ya punguzo la kawaida la moja ya tatu (¹/₃) linalotolewa chini ya Kifungu 49(1) cha Sheria ya Magereza Sura ya 58, wafungwa hao  sharti wawe wametumikia robo (¹/₄) ya adhabu zao gerezani isipokuwa wafungwa walioorodheshwa katika Ibara ya 2(i – xxi).

(ii)        Wafungwa wagonjwa wenye magonjwa kama UKIMWI, Kifua kikuu (TB) na Saratani (Cancer) ambao wako kwenye “terminal stage”. Wafungwa hawa wathibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

(iii)       Wafungwa wazee wenye umri wa miaka sabini (70) au zaidi.  Umri huo uthibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

(iv)       Wafungwa wa kike walioingia na mimba gerezani, pamoja na wale walioingia na watoto wanaonyonya na wasionyonya.

(v)         Wafungwa wenye ulemavu wa mwili na akili (Physical disability and mental disability). Ulemavu huo uthibitishwe na Jopo la Waganga chini ya Uenyekiti wa Mganga Mkuu wa Mkoa/Mganga Mkuu wa Wilaya.

2.      Aidha, Msamaha wa Mheshimiwa Rais hautawahusu wafungwa wafuatao:-

(i)              Wafungwa waliohukumiwa adhabu ya kunyongwa au kwa makosa ya kujaribu kuua (attempt to murder).

(ii)       Wafungwa waliohukumiwa adhabu ya kunyongwa na adhabu hiyo kubadilishwa kuwa kifungo cha maisha au kifungo gerezani.

(iii)           Wafungwa waliohukumiwa kifungo cha maisha gerezani.

(iv)    Wafungwa wanaotumikia kifungo kwa makosa ya kujihusisha na usafirishaji na matumizi ya madawa ya kulevya kama vile cocaine, heroin, bhangi n.k.

(v)     Wafungwa wanaotumikia kifungo kwa makosa ya kujihusisha na uombaji na upokeaji au utoaji rushwa.

(vi)      Wafungwa wanaotumikia kifungo kwa makosa ya unyang’anyi na unyang’anyi wa kutumia silaha au kujaribu kutenda makosa hayo (robbery with violence, armed robbery and attempted robbery).

(vii)    Wafungwa wanaotumikia kifungo kwa makosa ya kupatikana na silaha, risasi au milipuko isivyo halali (fire arms, ammunitions and explosives).

(viii)        Wafungwa wanaotumikia kifungo kwa makosa ya shambulio la aibu, kunajisi, kubaka na kulawiti, ukatili dhidi ya watoto au kujaribu kutenda makosa hayo.

(ix)           Wafungwa waliopatikana na hatia na kuhukumiwa kifungo kwa kosa la kuwapa mimba wanafunzi wa Shule za Msingi na Shule za Sekondari na ambao walitenda kosa hilo wakiwa na umri wa miaka kumi na nane (18) na kuendelea.

(x)             Wafungwa wanaotumikia kifungo kwa makosa ya wizi wa magari na pikipiki, uharibifu wa miundombinu au kujaribu kutenda makosa hayo.

(xi)           Wafungwa wanaotumikia kifungo chini ya Sheria ya Bodi ya Parole (Act. No. 25/1994), Sheria ya Huduma kwa Jamii (Act. No. 6/2002) na Kifungo cha Nje {The Prisons (Extra Mural Penal Employment) Regulation}.

(xii)   Wafungwa waliopatikana na hatia na kuhukumiwa kifungo kwa makosa ya kutumia vibaya madaraka yao na kuhujumu uchumi.

(xiii)     Wafungwa waliowahi kupunguziwa kifungo na Msamaha wa Mhe. Rais na bado wangali wanaendelea kutumikia sehemu ya kifungo kilichobaki.

(xiv)     Wafungwa waliopatikana na hatia na kuhukumiwa kwa kosa la kuzuia watoto kupata masomo.

(xv)     Wafungwa waliopatikana na hatia na kuhukumiwa kwa kosa la utekaji wa watoto, kupoka na kufanya biashara ya binadamu (Human Trafficking).

(xvi)    Wafungwa waliopatikana na hatia na kuhukumiwa kwa kosa la kukutwa na viungo vya binadamu.

(xvii)      Wafungwa wanaotumikia vifungo kwa makosa ya kujihusisha kwa namna yoyote ile na nyara za Serikali na ujangili (poachers).

(xviii)    Wafungwa wanaotumikia vifungo kwa makosa ya wizi/ubadhirifu wa fedha za Serikali.

(xix)   Wafungwa wanaotumikia vifungo kwa makosa ya kutoroka au kujaribu kutoroka chini ya ulinzi halali au kusaidia kutendeka kwa makosa hayo na bado wangali wanatumika adhabu hizo.

(xx)          Wafungwa walioingia gerezani baada ya tarehe 7 Aprili, 2018.

(xxi)        Wafungwa waliowahi kufungwa gerezani (warudiaji) na wale wenye makosa ya kinidhamu gerezani.

3.      Wafungwa 3,319 watafaidika na Msamaha huu ambapo 585 wataachiliwa huru tarehe 26 Aprili, 2018 na 2,734 watabaki gerezani kumalizia sehemu ya kifungo kilichobaki baada ya kupewa msamaha huu. Ni mategemeo ya Serikali kwamba watarejea tena katika jamii kushirikiana na wenzao katika ujenzi wa Taifa na kwamba watajiepusha kutenda makosa ili wasirejee tena gerezani.

Maj. Jen. Projestus Rwegasira

KATIBU MKUU - WIZARA YA MAMBO YA NDANI YA NCHI

26 Aprili, 2018

Read More

JESHI LA MAGEREZA LAJIPANGA KUJITOSHELEZA KWA CHAKULA CHA WAFUNGWA

Na Lucas Mboje - Jeshi la Magereza;

Mkuu wa Jeshi la Magereza nchini, Kamishna Jenerali Dkt. Juma Malewa, amesema Jeshi hilo limeanza kufanyia kazi agizo la Rais John Magufuli la kuhakikisha wanajitosheleza kwa chakula na kulisha wafungwa.

Amesema hatua hiyo itaondoa utaratibu wa wafungwa kupelekewa chakula kutoka nje, kwa kuwa watakuwa wanakula wanachokizalisha wakiwa magerezani.

Jenerali Dkt. Malewa alisema hayo katika mkutano wa maafisa waandamizi wa Jeshi la Magereza kutoka maeneo mbalimbali kuweka mkakati wa namna ya kufanikisha agizo hilo la Rais alilolitoa akiwa mkoani Dodoma hivi karibuni.

Rais Magufuli alilitaka jeshi hilo kuhakikisha linawatumia wafungwa kuzalisha chakula kwa ajili ya kuwalisha badala ya kutegemea ruzuku ya serikali kwa chakula.

Alisema kwa sasa Jeshi hilo lina uwezo wa kujitosheleza kwa chakula kwa asilimia 30, kutokana na vifaa vichache vilivyopo, lakini wanatarajia kupokea na kuongeza vifaa zaidi yakiwamo matrekta ili kuongeza nguvu zaidi ya uzalishaji na kufikia asilimia 100 ya kujitosheleza kwa chakula.

“Zoezi hili halitawezekana kutekelezwa kwa haraka sana, itatuchukua kama miaka miwili hadi mitatu kulifanikisha, lakini kwa kutumia nguvu kazi tuliyonayo na vifaa, tutamudu kulitekeleza,” alisema Kamishna Jenerali wa Magereza.

Malewa alibainisha mkakati wa kuhakikisha Magereza inatumika kama chuo cha mafunzo kwa kuwafundisha wafungwa mbinu mbalimbali za kilimo ili wote watumike vyema na kwa ufanisi katika kuboresha sekta ya kilimo.

Hata hivyo, alikiri kuwapo changamoto ya nguvu kazi kama baadhi ya wafungwa wakiwamo waliohukumiwa kunyongwa na mahabusu ambao kisheria hawapaswi kuwa nje ya Magereza, ingawa wanakula magerezani.

Kuhusu agizo la Rais la kuitaka Magereza kuwa sehemu ya ukuzaji wa uchumi kupitia sekta ya viwanda, alisema hilo wameanza kulitekeleza kivitendo kwa kuanzisha kiwanda cha sukari katika Gereza la Mbigiri, kinachojengwa kwa ubia kwa kushirikiana na mashirika ya Hifadhi za taifa ya NSSF na PPF pamoja na kiwanda cha viatu kilichopo Magereza Karanga mkoani Kilimanjaro na kwamba kinajengwa kingine hivyo kuwa viwili eneo moja.

“Tumeshapata oda za ndani na nje ya nchi, na tukishafunga mashine zaidi za kisasa, tutazalisha viatu kwa wingi sana,” Alisema Dkt. Malewa.

Mkuu wa Magereza Mkoa wa Morogoro, SACP. Ramadhani Nyamka, alisema wamejipanga kutekeleza agizo la Rais kwa kuzalisha kwa wingi, kwani Morogoro ina Magereza 12 na mengi yanajihusisha na uzalishaji wa mazao ya kilimo.

SACP. Nyamka alisema kutokana na kuwa na ardhi yenye rutuba, maji mengi na miundombinu yote muhimu ya kilimo, wanaamini wataweza kufanikiwa.

“Katika Magereza ya Morogoro niseme nguvu kazi inajitosheleza, kwani hatuna wafungwa waliohukumiwa kunyongwa, kwa hiyo tutatumia fursa ya Morogoro kama ghala la Taifa la chakula kulima kwa bidii tujitosheleze na ziada tuhudumie maeneo mengine, yakiwamo mashule,” alisema SACP. Nyamka.

Mrakibu Mwandamizi wa Magereza, Ramadhani Mkele ambaye ni Mkuu wa Gereza Kuu la Arusha, alisema pamoja na kutegemea kilimo cha jembe la mkono kwa kuwatumia wafungwa, wakipata vitendea kazi kama matrekta  wanaweza kupanua zaidi shughuli za kilimo katika gereza hilo.

Kamishna wa Fedha na Utawala wa Magereza, Gaston Sanga akitoa neno fupi kabla ya kumkaribisha Kamishna Jenerali wa Magereza kufungua rasmi kikao kazi hicho.

Kamishna Jenerali wa Jeshi la Magereza, Dkt. Juma Malewa akiongoza Kikao Maalum cha kujadili mikakati ya utekelezaji wa Jeshi la Magereza kujitosheleza kwa chakula.

Wajumbe wa Kikao hicho ambao ni Maafisa Waandamizi wa Jeshi la Magereza wakifuatilia kwa makini maelekezo kutoka kwa Kamishna Jenerali wa Magereza, Dkt. Juma Malewa(hayupo pichani).

Washiriki wa Kikao kazi ambao ni Maafisa Waandamizi wa Jeshi la Magereza wakifanya maadiliano mbalimbali katika vikundi kama inavyoonekana katika picha.

Kamishna Jenerali wa Magereza, Dkt. Juma Malewa(katikati) akiwa katika picha ya pamoja na Wakuu wa Magereza Mikoa yote Tanzania Bara(waliosimama mstari wa nyuma) mara baada ya ufunguzi rasmi wa kikao maalum cha kujadili mikakati ya utekelezaji wa Jeshi la Magereza kujitosheleza kwa chakula. Kikao hicho kimefanyika kwa siku moja 17 Machi, 2018 Mkoani Morogoro.

Kamishna Jenerali wa Jeshi la Magereza, Dkt. Juma Malewa, akisalimiana na Kamishna wa Utawala na Fedha wa Magereza, Gaston Sanga  mara baada ya kuwasili kwenye viwanja vya Nanenane, Mkoani Mororogoro tayari kwa Kikao Maalum cha Maafisa Waandamizi wa Jeshi hilo. Kikao hicho kimefanyika kwa siku moja  17 Machi, 2018 Mkoani Morogoro. 

Read More

JESHI LA MAGEREZA KUENDESHA MAFUNZO YA UJASIRIAMALI KWA WAFUNGWA

Na Lucas Mboje - Jeshi la Magereza;

Jeshi la Magereza limetiliana saini makubaliano na Asasi ya kiraia katika kuendesha  mafunzo ya ujasiriamali kwa wafungwa vijana wenye umri wa kati ya miaka 18 hadi 30 waliopo magerezani katika Mikoa ya nyanda za juu Kusini ikiwemo Mbeya, Songwe, Iringa, Njombe, Ruvuma, Katavi na Rukwa.

Hafla ya kutiliana saini makubaliano hayo imefanyika katika Ofisi za Makao Makuu ya Jeshi la Magereza jijini Dar es Salaam na Asasi ya TECHNOSERVE iliwakilishwa na Afisa wake Bw. Monsiapile Kajimbwa.

Akizungumza baada ya kutiliana saini makubaliano hayo, Kamishna Jenerali wa Magereza, Dkt. Juma Malewa amesema kuwa mafunzo hayo ya ujasiriamali yatawapa uwezo wafungwa wa kubaini na kutumia fursa mbalimbali za kiuchumi ikiwemo uwezo wa kubuni na kuandaa mipango ya biashara.

“Mafunzo haya yatawanufaisha sana wafungwa waliopo magerezani katika mikoa hiyo kwani yatawajengea uwezo wa kujitambua pamoja na kujipatia vipato halali badala ya kutenda uhalifu katika jamii.” Alisema Jenerali Malewa.

Ameongeza kuwa mafunzo hayo yatafanyika katika Chuo cha Ufundi cha Magereza Ruanda kilichopo Mkoa wa Mbeya ambapo wafungwa watajifunza nadharia na vitendo katika dhana nzima ya ujasiriamali ikiwemo stadi za utengenezaji sabuni, ushonaji, useremala, ufumaji sambamba na uandaaji wa mipango ya kibiashara.

Meneja Mkazi wa Asasi ya TECHNOSERVE, Bw. Monsiapile Kajimbwa amesema kuwa hatua ya kutiliana saini makubalino hayo ni kuimarisha ushirikiano kati ya Asasi yake na Jeshi la Magereza katika kutoa mafunzo kwa wafungwa ili waweze kupata ujuzi kupitia program hiyo.

Dira ya Jeshi la Magereza ni kuwa Jeshi la kurekebisha wahalifu lenye utaalam wa hali ya juu linaloendeshwa katika kanuni na viwango vilivyowekwa Kitaifa na Kimataifa.

Kamishna Jenerali wa Jeshi la Magereza,  Dkt. Juma Malewa(meza kuu mbele) akisaini Mkataba  wa makubaliano baina ya Asasi ya TECHNOSERVE katika mradi wa mafunzo ya ujasiriamali kwa Wafungwa waliopo magerezani. Kulia ni Meneja Mkazi wa Asasi ya hiyo Bw. Monsiapile Kajimbwa akisaini mkataba huo.  Hafla fupi ya  utilianaji saini Mkataba huo Machi 19, 2018 Makao Makuu ya Jeshi la Magereza, Jijini Dar es Salaam.

Kamishna Jenerali wa Jeshi la Magereza, Dkt. Juma Malewa(kushoto) na Meneja Mkazi wa Asasi ya TECHNOSERVE, Bw. Monsiapile Kajimbwa(kulia) wakionesha nyaraka za Mkataba wa makubaliano mara baada ya utiliananji wa mkataba huo wa  mradi wa mafunzo ya ujasiriamali kwa Wafungwa waliopo magerezani.

Kamishna Jenerali wa Jeshi la Magereza, Dkt. Juma Malewa akipongezana na Meneja Mkazi wa Asasi ya TECHNOSERVE, Bw. Monsiapile Kajimbwa mara baada ya kubadilishana Mkataba wa makubaliano baina ya Asasi hiyo katika mradi wa mafunzo ya ujasiriamali kwa Wafungwa waliopo magerezani.

Maafisa Waandamizi wa Jeshi la Magereza wakishuhudia utiliananji saini wa mkataba huo. Kulia ni Kamishna Msaidizi Mwandamizi wa Magereza, George Mwambashi kutoka Divisheni ya Sheria ya Magereza(kushoto) ni Mrakibu Mwandamizi wa Magereza, Uswege Mwakahesya ambaye ni Mratibu wa Programu za Ujasiriamali katika Jeshi la Magereza  

(Picha zote na Lucas Mboje wa Jeshi la Magereza).

Read More

JESHI LA MAGEREZA LASHIRIKI VYEMA MAADHIMISHO YA WIKI YA SHERIA NCHINI, JIJINI DAR

Naibu Kamishna wa Magereza Tusekile Mwaisabila(wa pili toka kushoto) akiwa na Kamishna Msaidizi Mwandamizi wa Magereza, Mussa Kaswaka(wa tatu toka kulia) pamoja na Maafisa wa Jeshi la Magereza  wakishiriki maandamando ya Maadhimisho ya wiki ya sheria. Maandamano hayo yalfanyika jana Januari 28, 2018 yakianzia katika Viwanja vya Mahakama ya Kisutu na kuishia katika Viwanja vya Mnazi Mmoja jijini Dar es salaam.

Baadhi ya askari wa Jeshi la Magereza wakishiriki katika maandamano hayo jana ambapo yaliongoozwa na Jaji Mkuu wa Tanzania Mhe. Profesa. Ibrahim Juma.

Baadhi ya Wananchi waliotembela Banda la Jeshi la Magereza wakipata ufafanuzi wa mambo mbalimbali kutoka kwa Maafisa Magereza kuhusiana na Uendeshaji wa Jeshi la Magereza kama inavyoonekana katika picha.

Mrakibu wa Magereza, Amina Kavirondo ambaye ni Mwanasheria kutoka Kitengo cha Sheria Makao Makuu ya Magereza akitoa ufafanuzi kwa kisheria kwa Mwananchi aliyetembelea katika Banda la Magereza katika Viwanja vya Mnazi Mmoja kwenye Maonesho ya wiki ya Sheria hapa nchini.

(Picha zote na Cpl. Mfaume wa  Jeshi la Magereza).

Read More

KAMISHNA JENERALI WA MAGEREZA, DKT. JUMA MALEWA ATETA NA MAHABUSU GEREZA KEKO MAADHIMISHO YA WIKI YA SHERIA NCHINI

Kamishna Jenerali wa Magereza nchini Dkt. Juma Malewa akiwasili katika Gereza la Mahabusu Keko jijini Dar es salaam katika ziara yake ya kikazi kukagua gereza hilo leo Januari 28, 2018 ikiwa ni sehemu ya Maadhimisho ya Wiki ya Sheria hapa nchini. Jeshi la Magereza ni moja ya wadau muhimu katika sekta ya Sheria hapa nchini. 

Kamishna Jenerali wa Magereza nchini Dkt. Juma Malewa akisalimiana na Mkuu wa Gereza la Mahabusu Keko, Kamishna Msaidizi wa Magereza, Kiangi Abdallah alipowasili katika ziara yake ya kikazi kukagua gereza hilo ikiwa ni sehemu ya Maadhimisho ya Wiki ya Sheria hapa nchini. Wengine ni Maafisa Waandamizi wa Jeshi hilo.

Mkuu wa Gereza la Mahabusu Keko, Kamishna Msaidizi wa Magereza, Kiangi Abdallah akitoa taarifa fupi mbele ya Kamishna Jenerali wa Magereza nchini Dkt. Juma Malewa kabla ya kumkaribisha kuongea na Mahabusu wa Gereza Keko(hawapo pichani).

Kamishna Jenerali wa Magereza nchini Dkt. Juma Malewa akiongea na Mahabusu wa Gereza Keko(awapo pichani) leo Januari 28, 2018 alipotembelea gereza hilo ikiwa ni sehemu ya Maadhimisho ya Wiki ya Sheria hapa nchini

Kamishna Jenerali wa Magereza nchini Dkt. Juma Malewa akimsikiliza Mahabusu ambaye ni raia wa kigeni mara baada ya kuongea na Mahabusu wa Gereza Keko.

Kamishna Jenerali wa Magereza nchini Dkt. Juma Malewa akikagua jiko la gesi katika Gereza la Mahabusu Keko. Jeshi la Magereza tayari limeanza kutekeleza maelekezo ya Serikali ya kuachana na matumizi ya kuni kwa kutumia nishati ya gesi katika baadhi ya magereza nchini hivyo kutunza mazingira.

Maafisa Waandamizi wa Jeshi la Magereza wakiwa katika chumba Maalum, Gereza Keko ambapo chumba hicho kitatumika katika Uendeshaji wa Mashauli mbalimbali kwa kutumia njia ya TEHAMA. Uwepo wa mfumo huu utalipunguzia gharama Jeshi la Magereza katika kuwasafirisha Mahabusu mahakamani na kuwarejesha magerezani.

Kamishna Jenerali wa Magereza nchini, Dkt. Juma Malewa(katikati) akiwa katika Chumba Maalum ambacho kitatumika katika uendeshaji wa mashauli kwa kutumia njia ya  TEHAMA(wa kwanza kushoto) ni  Kaimu Mkuu wa Magereza Mkoa wa Dar es Salaam, Kamishna Msaidizi wa Magereza, Noel James(wa kwanza kulia) ni Mkuu wa Gereza Keko, Kamishna Msaidizi wa Magereza, Kiangi Abdallah 

(Picha zote na Lucas Mboje wa Jeshi la Magereza).

Read More